MENU

ELITE: Radicevic, heroia Miribillan

(FOTO/ARGAZKIA: acb Photo / A. Arrizabalaga)

 

 

Antolatzailearen hiruko batek, 2.7 segunduren faltan, Surne Bilbao Basketek FC Barcelona irabazteari bidea eman zion. Aste Santuko asteburuan, liga erregularra amaitu da bai LF2an bai Zilarrezko LEB Platan. Maila honetan, Teknei Zornotza Bizkaia igoerarako borrokan arituko da.

SURNE BILBAO BASKET 82 – FC BARCELONA 80

Partida zoragarria Miribillan. Radicevic-en hiruko batek, 2.7 segunduren faltan, garaipena eman zien Jaume Ponsarnauren gizonei. Aurretik, oso neurketa parekatua eta emozioz beteriko amaiera: Radicevic-en hirukoa, Abrines-en hirukoa eta antolatzailearen beste hirukoa garaipena Bilbon geratzeko.

HOZONO GLOBAL JAIRIS 50 – LOINTEK GERNIKA BIZKAIA 55

Anna Montañanaren neskek garaipen garrantzitsua lortu zuten Alcantarillan, bosgarren postuan mantentzeko. Abantail gutxiko partidan, bizkaitarrek defentsa bikaina sortu zuten azken txanpan eta Ygueravidek 7 puntu saskiratu zituen azken laurdenean. Datorren asteburuan jokatuko da azken jardunaldia eta bizkaitarrak bosgarrenak izango dira (eta Zaragozaren aurka jokatuko lukete final laurdenetan) Duran Maquinaria Ensinori irabazten badiote.

MELILLA SPORT CAPITAL ENRIQUE SOLER 73 – TEKNEI ZORNOTZA BIZKAIA 86

Laugarren garaipen jarraian Mikel Garitaonandiaren mutilentzat Melillan, atsedenaldian erabakitako partidan, bigarren laurden bikainari esker (11-25). Amorebietako taldeak Mendebaldeko konferentziaren hirugarren postuan amaitu du denboraldia eta Odilo Cartagenaren aurka (Ekialdearen zazpigarrena) jokatuko du lehen kanporaketan.

HGB AUSARTA BARAKALDO 51 – UNICAJA MIJAS 71

Denboraldiko azken partida Lasesarren, Alberto Cearen neskek porrot zabala jaso zuten Igoera Fasea jokatuko duen aurkari baten aurrean. Erdiko laurdenak klabeak izan ziren: 27-44ko emaitza bisitarientzat. Bizkaitarrak gehiagotik gutxiagora joan dira: hasiera ikusgarria, 6-2ko balantzearekin, baina gero bakarrik 3 garaipen gehiago lortu dute.